Lavora con noi
ASSISTENTA/ASSISTENT DE REDAZIUN GRUP LINGUISTICH LADIN SENTA DE BALSAN 2025
Contest de referimënt
La RAI Radiotelevijiun Taliana S.p.A. á bele da n pez scomencé n percurs por passé da broadcaster a media company; tröpes é, te chësta fasa, les mudaziuns de interes por l’Aziënda. Sostenibilité, svilup tecnologich, digitalisaziun di prozesc de business y produtifs, modalités nöies de laur, data driven company. Te n contest de inovaziun tecnologica adöm al’evoluziun di marciá, ales tröpes plataformes y canai distributifs che röia lapro, al interes da ciafé fora i debujëgns de targets nüs adöm ala misciun de Sorvisc Publich, mët l’Aziënda le focus sön profescionalités che ti é a chëstes desfides nöies y che pó acompagné chësta transiziun.
Te chësc contest, en referimënt ince ala convenziun por la valorisaziun dles istituziuns y dles cultures locales (ex art. 45 dl Test Unich dla radiotelevijiun) promöi la RAI na scomenciadia de seleziun por titui y proes cun le fin de abiné 1 Assistënta/Assistënt de Redaziun dl grup linguistich ladin por la Redaziun ladina tla sënta da Balsan da tó sö cun contrat a tëmp indeterminé.
Al vëgn do na descriziun dles responsabilités y dles ativités che reverda le profil che vëgn chirí.
L’Assistënta/Assistënt de redaziun:
Se dá jö tles redaziun jornalistiches cun dötes les ativités organisatives-aministratives y de secreteriat y fej ativités de sostëgn ala realisaziun de produc jornalistics ince adoran tecnologies informatiches (p.ej. l’acuisiziun y mené inant de files te formac desvalis, cun l’imisciun de elemënc essenziai por l’identificaziun “metadataziun”; elaboraziun de material audio/video da adoré por le web; archirida de contignüs tl sistem o defora dal sistem de produziun di notiziars). En relaziun al livel de esperiënza y competënza madorí man man, él la poscibilité da se spezialisé gradualmënter te ativités organisatives y de planificaziun di evënc.
1. RECUISIC DE AMISCIUN
I recuisic de obliënza é:
A. Portignënza al grup linguistich ladin (da zertifiché tres l’atestat de portignënza al grup linguistich dé fora dal Tribunal de Balsan nia plü vedl de 6 mëisc);
B. Diplom de cin’ agn de na Scora Secundara de secund degré, o n titul ecuivalënt sce an á frecuenté scores foradecá;
C. Patent dl auto cat. “B”;
D. Conescënza dl lingaz ladin y dl lingaz talian o todësch (tla fasa de adejiun ala scomenciadia sarál da chirí fora le lingaz talian o todësch) che corespogn al profil profescional de Assistënta/Assistënt de Redaziun (sciöche ejëmpl y por analogia valí al livel “B” dl’atestat de trilinguism dla Provinzia Autonoma de Balsan che corespogn al livel “B2” dl QCER).
Al vëgn spezifiché che al ne vëgn nia damané l’atestat de trilinguism.
Chisc recuisic vëgn aratá essenziai y de oblianza y an mëss bele i avëi tla data canche al toma chësc avis de seleziun, sciöche ince tratan döt le prozedimënt de seleziun y tl at de na assunziun eventuala.
Ala seleziun pó tó pert i zitadins taliagn y les zitadines talianes, i zitadins y les zitadines dl’Uniun Europeica y i zitadins y les zitadines di Paisc che ne alda nia pro l’Uniun Europeica, tan inant che ai vir regolarmënter tla Talia.
Les fases I y II podará gní fates da defora y al vëgn porchël damané chësta dotaziun tecnica por podëi fá la proa:
- PC (sistem operatif Windows 8 o che vëgn do) o LINUX o MAC (MAC-OS 10.14 o che vëgn do) cun webcam y microfon y adoranza de oblianza de GOOGLE CHROME (almanco la verjiun 81.0) sciöche browser;
- Conesciun Internet cun na velozité de almanco 1,5 Mbps en upload y download. L’abilitaziun al ejam è te vigni caje subordinada a n check requirement te chël che al gnará damané, i dis dan dala proa, da fa na sesciun por verifiché i stromënc y la conetivité tl ambiënt da olache al gnará fat l’ejam;
- Smartpone o tablet (Android min v.4.1 – IOS min. v.8) cun camera.
Al vëgn ince aconsié l’adoranza dl wi-fi. Tratan la prozedöra gnarál damané da desćiarié na APP sön le smartphone/tablet (34MB) dal Play Store o App Store (aladô dl sistem operatif Android o IOS che an á sön le smarthpone).
Gaujes de esclujiun
Al ne podará nia tó pert ala scomenciadia seletiva o, sce ai á arjunt l’idoneité, ne podará nia gní tuc sö chi che:
- é gnüs lasciá jí dala Rai Radiotelevisione Italiana S.p.A. o da n’atra Sozieté dl Grup por na bona gauja o na rajun sogetiva motivada;
- á lascé sö cun düc a öna le raport de laur cun l’Aziënda o cun d’atres Sozietés dl Grup cun na incentivaziun economica por lascé le post de laur;
- resultëia bele ales dependënzes dla RAI o de n atra Sozieté dl Grup te n raport de laur subordiné a tëmp indeterminé, ince de lernerat, che é do a jí inant tl mumënt dla data de tomanza de chësc avis o che vëgn costituí, tres la sotscriziun de n contrat de assunziun, tratan la perioda te chëra che al vëgn fat la seleziun, o ince de validité dla gradatöra.
2. DOMANDA DE AMISCIUN
La domanda de amisciun mëss gni presentada te na manira tassativa anter les ores 12.00 dl 24 aurí 2025, ma scrian fora le form online che é da ciafé tla pert resservada ala scomenciadia “SELEZIUN ASSISTËNTA/ASSISTËNT DE REDAZIUN GRUP LINGUISTICH LADIN SËNTA DE BALSAN 2025” ales misciuns www.raibz.rai.it y/o www.lavoraconnoi.rai.it.
Le sistem informatich ne azetará nia domandes do les ORES 12.00 dl 24 aurí 2025.
Per podëi mené la domanda de amisciun mëssen:
- consulté l’avis de seleziun sön le sit www.raibz.rai.it;
- tó pert a la scomenciadia clican sön “VÁ ITE POR TÓ PERT”
- mëte ite la misciun e-mail a chëra che le sistem ti menará atira, automaticamenter, le link por ti podëi permez ai formulars por scrí fora i dac personai;
- cliché sön le link che an á ciafé tres e-mail por tó pert al form da scrí fora online;
- implí fora düc i ciamps dl form cun les informaziuns y i documënc damaná;
- confermé i dac scric ite y mené demez la candidatöra clican sön “Confermëia i dac metüs ite y mëna”.
Canche le candidat o la candidata ará rové da scrí fora y mené le form ciafarál/a n messaje de posta eletronica generé automaticamënter, per confermé che la candidatöra é gnüda dada jö.
La domanda de amisciun online mëss gní scrita fora te dötes les pertes y al é da injunté:
- n curriculum tl format standard europeich ajorné cun fotografia (tl format .pdf);
- n zertificat de portignënza o de agregaziun al grup linguistich ladin relascé dal Tribunal de Balsan nia plü vedl de 6 mëisc (tl format .pdf);
- copia o zertificat dl diplom de cin’agn de na Scora secondara de secund degré (o na detlaraziun dl secretariat dl Istitut) o de n titul ecuivalënt de na Scora de foradecá, cun indicaziun dla valutaziun (tl format .pdf);
- por chi che ess stlüt jö so titul de stüde foradecá vara debojëgn da injunté na documentaziun che atestëia le reconoscimënt tla Talia dl valur dl titul de foradecá (tl format .pdf)
- na copia dla pert dant y dla pert iadedô dla patent dl auto varënta cat. “B” (tl format .pdf); al ne gnará nia conscidré sciöche varënta l’iscriziun a n curs da avisé o le documënt rosa (Foglio rosa);
- por i zitadins y les zitadines de n Paisc che ne alda nia pro la Union Europeica, na copia dl titul de sojornanza varënt che i abilitëia al ativité de laur, sciöche ince la documentaziun che desmostra la desponibilité de na sistemaziun te n cuartier adaté (tl format .pdf);
La Rai pó, te vigni fasa dl iter de seleziun, dan dal’assunziun o tl at dl’assunziun, stabilí l’esclujiun di candidac o dles candidates o la nia convocaziun o amisciun ala fasa che vëgn sce: al mancia i recuisic o la documentaziun preodüda por demostré le posses; por domandes rovades massa tert o cun d’atres modalités de chëres dades dant; por domandes multliples; falsité dles detlaraziuns dades jö; mancianza o funzionamënt nia sciöche al toca dles dotaziuns tecniches/informatiches damanades; azertamënt de öna o deplö gaujes de esclujiun preodüdes tl Punt 1 – Recuisic de partezipaziun/Gaujes de esclujiun.
3 – COMUNICAZIUNS
Dötes les comunicaziuns cun i candidac y les candidates gnará fates ma tres e-mail adoran la misciun de posta eletronica dada dant canche an á mené demez la candidatöra, sides tratan le prozes de seleziun che ince tratan döta la fasa dan dal’assunziun.
Chësta comunicaziun ará valur de notificaziun te vigni efet de lege.
I candidac y les candidates podarà contaté Rai ti scrian ala misciun de posta eletronica dedicada hrbz@rai.it
I resultac dl’amisiciun ala seleziun, ales fases che vëgn o y i resultac dles proes fates, gnará comunicá ai candidac y ales candidates tres e-mail.
4 - VALORISAZIUN DI TITUI
Ala prozedöra de seleziun podará tó pert les prömes 25 unités (plö eventuai ex-aequo) sön la basa de chësta valutaziun a punc:
- Nota dl diplom de cin’agn de Scora secondara de secund degré: da 0 (36/60 o 60/100) a 20 punc (60/60 o 100/100);* * Ai fins dl’assegnaziun di punc (da 0 a 20 pp) gnará dötes les notes dades en 60ejims convertides en 100ejims, aplican la formula [Nota:60 = X:100]
Sce an á dui o plö diploms gnarál ma valorisé le titul che dá le dërt al numer de punc plö alt.
Superé chësta fasa de valorisaziun di titui, cun le numer de punc che ne gnará nia tut en conscidraziun por la formaziun dla gradatöra finala – è condizun por l amisciun ala I Fasa dl percurs seletif.
5 – PROES DE VALUTAZIUN Y GRADATÖRA
La I y II fasa dla prozedöra seletiva podará gní fates en modalité a destanza. Ara jará porchël debojëgn da se coleghé a na plataforma on-line cun la misciun avisa che gnará comunicada tla fasa de convocaziun.
La III fasa dl prozes é da fá en presënza a Balsan.
Le prozes de seleziun gnará fat te chëstes fases:
I Fasa – Valutaziun dl lingaz ladin y dl lingaz talian o todësch (punt 1.D)
La I fasa odará danfora na conversaziun cun le fin da valuté le livel de conoscënza dl lingaz ladin y dl lingaz talian o todësch (le lingaz talian o todësch sará da chirí fora tla fasa de adejiun ala scomenciadia).
Superé chësta proa, cun le numer de punc che ne gnará nia tut en conscidraziun por la formaziun dla gradatöra finala, é condiziun por l’amisciun ala fasa che vëgn do dl percurs seletif.
II Fasa – Multiple choice
La secunda fasa, gnará ma fata sce le numer dles candidatöres varëntes, do le superamënt dla pröma fasa, sará de plö de 10. Ará gnará fata cun n test scrit cun deplö poscibilités de resposta danter chëres che al sará da chirí fora la dërta (multiple choice). Ara sará tl lingaz ladin cun le fin da verifiché le livel de cultura generala y dl raiun, le savëi spezifich che reverda l’inciaria (storia dla radioa y dla televijiun; teories y tecniches dla comunicaziun y dimedia nüs; conescënza di social media; tecniches de tai audio/video; tecniches de archiviaziun, archirida y digitalisaziun di materiai audio/video), abilités generales y spezifiches y conescënza dl lingaz inglesc.
La proa gnará cunscidrada sciöche superada por les prömes 10 unités (al netto de ex aequo eventuai).
Superé chësta proa, cun le numer de punc che ne gnará nia tut en conscidraziun por la formaziun dla gradatöra finala, é condiziun por l’amisciun ala fasa che vëgn do dl percurs seletif.
Tratan chësta proa preseletiva gnarál garantí le prinzip dla coreziun automatica y anonima.
III Fasa – Colloquium profescional, Colloquium por imparé da conësce y motivazional
La terza fasa sará sot forma de:
- Colloquium profescional (tl lingaz ladin): aprofondimënt dles conescënzes y dles competënzes tecniches y profescionales cun valutaziun dl curriculum vitae presenté tl format standard europeich. La tipologia y i temesc dl colloquium sará: storia dla radio y dla televijiun, teories y tecniches dla comunicaziun y di media nüs; conescënza di social media; tecniches de tai audio/video; tecniches de archiviaziun, archirida y digitalisaziun di materiai audio/video (max 50 punc).
- Colloquium por imparé da conësce y motivazional (tl lingaz talian o todësch da chirí fora tla fasa de adejiun ala scomenciadia: le fin é da aprofondí les motivaziuns y aspetatives dl candidat o dla candidata. Al podará ince gní adoré stromënc sciöche n test atitudinal, dla personalité o de dinamiches de grup (max 50 punc).
Le numer de punc assigná vel por la formaziun dla gradatöra finala ma sce le candidat o la candidata ará arjunt almanco 30/50 punc te vigni proa singula ( Colloquium profescional y Colloquium por imparé da conësce y motivazional);
6 – COMISCIUN
La Rai nominará la comisciun de ejam.
7 – GRADATÖRA FINALA
Ala fin dla prozedöra de seleziun gnarál metü sö na gradatöra finala tignan cunt di punc arjunc tla terza Fasa (max 100 pp): le numer de punc assigná vél por la formaziun dla gradatöra finala – y gnará porchël valorisé - ma sce le candidat o la candidata ará arjunt almanco 30/50 punc tl Colloquium profescional y tl Colloquium por imparé da conësce y motivazional.
Le travert minim de idoneité vëgn fissé a 60/100 punc.
Tl caje de posiziuns ex aequo, gnarál trat dant le candidat/la candidata plü jona de eté.
Al vëgn araté davagnadú adaté o davagnadëssa adatada le pröm o la pröma tl ordin di punc.
Al vëgn araté adatá nia davagnadus o adatades nia davagnadësses i candidac o candidates che ará arjunt le medem numer de punc o deplü de chi preodüs por le travert minim de idoneité (30/50 por vigni proa), che resultëia tla gradatöra te posiziuns surafora respet al numer de posiziuns a desposiziun.
Nia adatá o nia adatades vëgn conscidrá/conscidrades i candidac o les candidates che n á nia arjunt le travert minim de idoneité te vigni proa.
La Rai podarà adoré la gradatöra di adatá nia davagnadus o dles adatades nia davagnadësses tl tëmp che ara vel, tl caje de renunzies o de esclujiuns da davagnadësses adatades o davagnadus adatá o de esigënzes che salta fora, aladô dl ordin di punc y sce al resta le travert minim de idoneité dé dant chiló dessura.
Le plan de assunziuns por i candidac aratá davagnadus adatá o les candidates aratades davagnadësses adatades, podará gni fat a mëteman dala data de publicaziun dla gradatöra y por döta la perioda de validité de chësta.
L’assunziun eventuala cun contrat de laur subordiné a tëmp indeterminé, che podará gni a s’al dé tratan i 36 mëisc de validité dla gradatöra, sará subordinada ala verificaziun di titui, al mantignimënt di recuisic damaná por la partezipaziun ala scomenciadia de seleziun y ala idoneité zënza limitaziuns y prescriziuns, ala mansciun che resultará dala vijita sanitara dan dal’assunziun.
L’azetaziun dla proposta de assunziun da pert dl’interessé o dl interessada ará da rové ite tl’Aziënda ti tëmps y tles formes definides tla fasa de proposta. La refüsa dla proposta de assunziun cun contrat de laur subordiné a tëmp indeterminé determinará l’esclujiun dala gradatöra finala.
Implü sará chësta assunziun condizionada dala renunzia a eventuales stritaries che an á cun l’Aziënda o dala defeniziun de raporc de laur eventuai a vigni titul che é gnüs a s’al dé cun la medema, tres transaziun tla sënta sindacala cun la renunzia tlera da per dl interessé o dl’interessada a vigni ghiranza ti confrunc dla dla Rai ex art. 2113 cc.
Tla fasa de preassunziun se resservëia l’Aziënda la poscibilité da fá la proposta de formes de flessibilité orara dl raport de laur tl caje che la forza de laur aratada adatada áis detlaré so interes y che chësc vais a öna cun les esigënzes produtives y organisatives dla strotöra de inserimënt.
Do dal inserimënt tla sënta proponüda, ará le candidat o le candidat le dovëi de permanënza de 5 agn tla sënta y ma, do che al sará tomé chësc termo, podarál gní fat domanda de trasferimënt. Chësta domanda ne podará te vigni caje nia gni tuta en conscidraziun sce ara n’é nia compatibla cun les esigënzes aziendales.
Atualmënter él preodü na Retribuziun Anuala Brutto de zirca 26.900 euro, che tól ince bele ite l’indenité de bilinguism. Surapró él preodü, en aplicaziun dles desposiziuns dl Contrat Coletif, y nia te na maniera automatica, mo en presënza de condiziuns spezifiches liades ai turnus tl setur de incadramënt, na indenité al mëis che corespogn al 8% dl paiamënt individual y dl’indenité de contingënza, che porta atualmënter a na Retribuziun Anuala Brutto de zirca 28.800 euro (zënza conscidraziun di incremënc preodüs dal renovamënt dl Contrat Coletif de Laur).
8 – DESPOSIZIUNS FINALES
N valgönes fases dla seleziun gnará fates da Rai en colauraziun cun na sozieté de seleziun Esterna, tlamada Selexi.
La sënta de laur preodüda é Balsan.
Les proes de de seleziun gnará fates bonamënter a mëteman da ma 2025.
Le candidat o la candidata che ne se prejëntará nia o ne azedará nia ala plataforma tles modalités, tl de, y ti orars stabilis o che se tira zoruch dala proa, anfat por ci gauja, gnará stlüt/a fora dala seleziun.
Les proes dla III Fasa gnará fates a Balsan.
Ai candidac y ales candidates che podará to pert ales singules fases gnarál menén na e-mail cun i detais dles proes (al vëgn invié da ciaré do ince tla posta antispam/indejidrada).
La Rai se tëgn le dërt de mudé jö la perioda te chëra che al gnará fat la prozedöra de seleziun.
Ai candidac y ales candidates ne ti vëgnel nia retü les spëises eventuales che ai/ares á eventualmënter por tó pert ala seleziun.
Al vëgn damané la desponibilité a fá trasfertes.
Ai candidac zitadins y ales candidates zitadines de Paisc che ne alda nia pro l’Uniun Europeica, se tëgn Rai la poscibilité da ti damané l’esibiziun tla forma originala dla lizënza de sojornanza che vel y che abilitëia a realisé l’ativité de laur y la documentaziun che desmostra la desponibilité de na sistemaziun te n cuartier adaté.
Rai á surapró te vigni fasa la facolté da trá zoruch la prozedöra seletiva aladô de so iudize nia sindacabl.
Sciöche preodü dal Plan Trienal de Prevenziun dla Coruziun de Rai S.p.A 2025-2027 ará i candidac y les candidates canche ai vëgn tuc sö da detlaré formalmënter che ai/ares ne é nia te situazuns de conflic de interes y incompatibilité, gnanca potenziales.
Roma,